කෝණය

එක කුඩය යට
වෙලී ගත උණුසුමට
මාවතේ යන යොවුන් යුවලට
මල් තුහිනයකි වට වැස්ස

තුන් සකය මත දුවන
වෙට්ටු දමා ඉගිලෙන
ත්‍රීවීල් මල්ලිලාට
කප් රුකකි මේ වැස්ස

දෙපයෙන් පණ ගහන
ආවරණ නැති මගේ නිල රථයට
අනෝරාවකි
පොද වැස්ස!

(අ?)සම්මත ප්‍රේමය

රතු මල් කුඩයට දම් පැහැ සාරිය ගැලපෙනවා නුඹට
ඔය සුදු මුහුණට එළියක් දෙන්නට පින් මදි ඉතින් මට

නොරටුන්ගේ බස අකුරු කෙරූවත් සැමදා සිත් රට නුඹට හිමී
නැතිමුත් හසරක් ඔබ මට මේ රට
මසිත් රට නුඹට හිමී

 
ගුරුතුමියයි නුඹ සිසුවා වෙමි මම පෙම්වතියත් නුඹමයි
කවදා හීනය කල එලි වේවිද
කාලය මට අහිමියි


(බොළඳ ගේය රචනාවක්ද මන්දා...
කොහොම උනත් ලිව්වෙ නම් සත්‍ය සිදුවීමක් ඇසුරෙන්.)

ගිය දෝණිට

දියවෙන වැකෙන ගොම මැටි පිරිබඩ          පොලොව

තාර තහඩුවෙන් වෑහෙන දිය                          කලත
වරිච්චියෙන් එල්බී උණ පතුරු                          ඇත
මුදුන් බාල්කයටත් අද සවිය                            නැත

තුන් ගින්දරක් නිවු සිරිමත් සවිය                        අත
වැරහැලි වෙලා ඇත පැද්දෙන ඇඳක්                  මත
මහ වැව සිදී වියලී ඉරි තැලී                             ඇත
පොඩි ඇල වේලි ගැන වෙහෙසී පලක්               නැත

පාලුය රැයම නිසලය නිහඬය                          දිගුය
තනි රකිනා සවිය උල ලේනිගෙ                     කවිය
තිබු එක පහන දැල්වූයෙත්                         අඳුරමය
ගොරවන්නෙත් නැතිව වැස්සම                  අසරණය

මහ ගෙය ඉඩම ඔප්පුවෙ මිලටත්                   වැඩිය
පත පොත දැනුම වෙත රුපියල                  යාලු විය
පැදුරත් නොදැන නුඹ වෙන් වී ගිය                 දිනය
මහ ගෙයි බාල්කය හිස මත                      පාත් විය

දෙවැනි මව්

කොනහමින් මා රිදවූ
දබර වී මා සිත තැලූ
මිතුරු ඇසුරට වැට බැඳ පෙලූ
පස මිතුරු ලෙස් වූ
දෙව් දුවයි ඔබ....

තනි නොතනියට ළඟ
දෙවැනි මව් නුඹ
කුඩම්මකු නොවී
හැදූ මව් නුඹ
වෙන්ව ගියත් නව කැදැල්ලක සිහිනෙට
යලි යලිත් සසර නුඹ වෙයන් අක්කා මට!

සරසවි බත

නිමිත්ත : සරසවි බත කා රු. 2500/= න් මසක් රෝල ගසා ගත හැක.

"ක්රා..ස් ස් "
"යස් මචං අද තුනයි"
බත් පතේ මැණික් ගරන අපි

අම්මත් එක්ක ලුණු නැතැයි වුණු දබර
දිට්ඨ ධම්ම වේදනීය වී
හපමි ලුණු කුට්ටි

දුප්පත් දිව බොජුන
කවදා විඳින්නද
හූල්ලන අපි

කිඩාරම් මල

පාලු අඳුරු නිසල රැයක
…වීදි කොණ දෙමහල් ගොඩනැගිල්ලක
…සුපිපුනු කිඩාරම් මල
…විඳින්නට එන සමනළයා මම. . .


බඹර දෙබරුන් සරන
…විෂ දළින් කිඩාරම් සුවඳ බිඳින
…පරාජිත රාජධානියේ
…සඳ කැල්ම වෙමි මම. . .




…සල් සපු නා ගෙමිදුලෙහි සිටුවන
…කිඩාරම් සුවඳට  වීදියට  ඇදෙන
…සපු මලක් දෝතින් ගෙන හිරු එළිය යට
…කිඩාරම් දුඟදට දොස් නගන
…කුහක බඹරකු නොවී. .
…අදිසි කිඩාරම් සුවඳටම ඇලුම් වන
…අහිංසක සමනළයෙක් වෙමි මම. . .

සුභ අලුත් අවුරුද්දක් වේවා!

සීතල බක් මහේ ලා සඳ නැඟ එද්දී
සිනා රස කැලුම් දස අත විසිරෙද්දී
සීතලු ලපලු මල් වැල් සුසුවඳ දෙද්දී
වේවා සැමට සුභ වසරක් සිත් පැහැදී

වපුල හිම පියලි මිහිකත පිසීවා
උණුසුම් සුභ පැතුම් ගුවනට මුසු වේවා
ප්‍රීති නාද කන්කලු වී රැව් දේවා
ලැබු නව වසර සැමටම කිරි ඉතිරේවා!!!

හොස්ටල්

සබරෙට ආමි
වට පිට බැලීමි
මිතුරු කිසිවකු නොවූයෙන්
දුරින් නැවතුනෙමි!
දිනෙන් දින ගෙවුනි
විඩාපත් වීමි
සැවොම හොස්ටල් වූයෙන්
මමද හොස්ටල් වීමි!

හුදකලා මිතුරී....

ළබැඳිම මිතුරියයි නුඹ මට
සැප දුක් සමවැ විමසන
දකිමි නුඹ මුව ගැඹුරින්, නුඹ මවුන් මුව
විඳිමි එසුවඳ රහසින්, ඇගෙ කවක් තුළ
තෙමයි මා නෙත් කෙවෙනි
සුසුමින් දෙදරවයි හද පතුල

කුරුලු කූඩු

උඹ මහ පවිටු අධම මිනිහෙක්!
ලෝකයා බැණ අඬ ගසයි මට
විපිලිසර වෙමි මං
"අනේ ඇයි බං, පවු නැද්ද මං"
"ලං වෙන්නෙපා පර හිමි හිතට ඔතරම්
හෙලන්නෙපා බිම කුරුලු කැදලි, සාප වෙයි උඹටම මචං"
පෙරලමි උඩු හිත වදන් වලට මං
"අනේ මට සමා වෙයන් බං"
සඟවා ගනිමි සදහටම මං........
යටි හිතේ තෙරපී කැකෑරෙන වේදනා පිරි චේතනා.....
අහිමි පෙම් හිත අත හරිමි දැං
ටජ්මහල් තනවන්න බැරි මං
හුදකලා වී පුරමි පිං
එතෙර වෙන්නට මේ භවෙං!

නුඹ ලඟ නැති මේ සසරේ....

අද වගේම එදත් වැස්සා
ඒත් එදා වැස්ස අද වගේ නෙමෙයි
හුඟක් සීතයි දැන් වැහි බින්දු
එදා වගේම අදත් නුඹ මගෙ ලඟ නම්...
උනුහුම් වැඩි වේවි හිම පියලිත්!
එදා වගේම අදත් හීන දකිනවා
ඒත් එදා හීන අද හීන නම් නෙමයි
නුඹත් එක්ක ඇවිදපු ඒ හීන මාවත්
අද පාලු වෙලා.... නුඹ නැතුවම
දකින්නෙම දැන් මුඩුම හීනමයි...
හ්ම්ම්ම්ම්ම්ම්ම්....

දුම!

ගිනි තැබුවත් නුඹ මා...
සීතලට ආතල් එකට...
දැල්වුනේ මා නොව...
නුඹේම නුඹේ තරුණ ජීවයයි!

කවිකම

එම්බා...
නුඹ කවුද
මා තුළ නිදා හුන්
කවියා අවදි කල
දැන් ඉතින් නොමැත නිවනක්
ලියනවා ලියනවා ලියනවා මිස
තවත් මුනිවත රකිනු කුමට
වහා උත්තර බඳිනු මට!

ආදර කන්ද!

සියක් කඳු පසු කරන් විත්
තරණය කළත් ආදර කන්ද
හමු නොවූ සොඳුරුතම මිටියාවත
නුඹේ හද බිමයි මියුලැසිය.....

කලියුගය

හරි වැරැද්ද, නිවැරැද්ද
සොයන්නට යන්නෙපා
මගෙ රත්තරන් පුතේ...
නවාපන් ඔලුව
වැරැද්දට උනත් උඹ
මගේ බුදු පුතේ...
වැරදි නිවැරදි කරන
ස්වප්නයක්වත් උඹ
එපා දක්නට එපා මගෙ පුතේ...
භද්‍ර නුඹෙ යව්වනය
භද්‍ර වූ දේශයක
භද්‍ර වූ කාලයක
ගෙවන්නට
පින් මඳයි
නුඹ පුතේ!

තනිකම....

තනි මට තනියට
මගෙ ලඟ කවුරුත්
තනි රකින්න මට නෑ..

තනි මට තනියට
තනි රකින්න මට
නුඹවත් අද ලඟ නෑ...

තනිකම රජයන
පාලුව පොපියන
දවස් ගෙවෙන විට
තනි මට, මමවත් නෑ....

සමාජය!

වවමි මම රෝස වත්තක්
පුදමි සුදු රෝස මලක් මිනිසුන්ට
පුදයි මට ආපිටට ඔවුන්
අකුලකින් නෙලා ගත් කටු මලක්!