දුක

A සිතට එන කළ Bද එයි
A යන විට Bද යයි
මම A ප්‍රිය කරමි A මා පෙළයි
එනිසා B වෙත යමි B අන්සතුයි
C මා ප්‍රිය කරයි මට සිතක් නොහැඟෙයි
Dට මා සෙල්ලමකි...
A to Z හෝඩියම නැත්නම්
දුකක් නොදැනෙයි
අවාසනාවට මා එයටම ඇලෙයි

යුද වීරයා

මැති ඇමැත්තන්
හමුදාවෙ ලොක්කන්
පොර වදිති අරගන්න
සාමයේ ගෞරවය

මගෙ පුතුගෙ නාමය ඵලකයක් මත ඇත
රටම දන්නේ නැතත් දිවි දුන්නෙ රටට බව...
මටත් උඹෙ පියාටත් බිරියටත් දරු දෙන්නටත්
වීරයෙක් උඹ සදාතන නිහඬ

වාම වාදීන්

ලක් සිසු සටන්
බිහි වූ දා පටන්
තිඹිරි ගෙය වී නම්
සත්‍ය සමවාදීන්ට

සර්ව කාලීන වී නම්
හදවතේ වම් ස්වරය
සැහැසිකම් කරමින
කුරිරු වේවිද මව් බිමට!

බොල් වී

පාවෙන විටදි බොල් වී මතුපිට               හැළියේ
දෑතින් අරන් විසි කෙරුවා මම                එළියේ
නැංවී එන විටදි බොල් පැළ කල            එළියේ 
බොල් බව දැන දැනත් මගෙ සිත තව     ඇලියේ 

ගත නුඹෙ ඇතත් නැවතී ළඟ සිලි         සිලියේ
සිත නුඹෙ විටින් විට යනවා අව           කෙළියේ
මගෙ හද අදර කුටියෙන් ඉල්පී              එළියේ
තව හදවත් සමග නුඹ යයි                    සැණකෙලියේ

පැන පැන සැතපෙමින් ගොස් නුඹ හදින්        හද
නැවතත් අවුත් ඉල්ලයි මගෙ ලැගුම්                හද
කරලින් බර වෙතැයි පැතුමින් පුරා                 හද
බොල් බව දැනත් බොල් ගොයමට බඳිමි         හද

පොදු ප්‍රශ්න කෙටියෙන්

නුඹ නිසාවෙන් හිමි වූ
…සරසවි වරම
…නිසාවෙන් නුඹ …මට
…අහිමි වේවිද?

සෙනෙහස් මල් කඳුළු

දුවක නොවූවද දුවකට මෙන්ම                         බැඳී
බිරිඳ නොවූවද බිරිඳට වඩා                              බැඳී
මවක ලෙසින් සලකා නුඹ සමග                        හිඳී
නුඹ දුන් කඳුළු තව මගෙ සෙනෙහසට                 මදී

රැය දහවලෙහි වෙනසක් නොම සිතා                 බැඳී
නුඹ ගැන සොයා බැලුවා නුඹ මගෙ                  පරිදී
මගෙ අත් වැරැද්දෙන් නුඹෙ හදවතට                    රිදී
දුන් දුක වැඩියි කර මගෙ සෙනෙහසට                 හදී

සෙනෙහස් සුවඳ නැතියෙන් හද පුරා                    පිරී
මගෙ හද සැතපි ඇත කුටියක් තුල                     සිපිරී
හදවත ගැහෙද්දී පිටුපා ගිය                             ඉතිරී
නැවැතුණු පසුව හඬලා පල නැත                      පිපිරී

සුවඳින් වණින් පිරි මල් නුඹ වෙත                     දුන්න
පාගා කිලිටි කෙරු සෙනෙහස් මල්                ගොන්න
යලි ගෙන සුරත වෙත එසුවඳ                   නොවිඳින්න
මිනී  මල් පුදා සෙනෙහස                           සමරන්න!